Ysgolion

Mae gan yr Awdurdod naw ysgol gynradd ac un Ysgol Uwchradd cyfrwng Cymraeg. Mae twf mawr wedi bod yn y nifer o geisiadau ar gyfer lle mewn ysgolion cyfrwng Cymraeg yma’n Wrecsam yn ystod y pymtheg mlynedd ddiwethaf, ac o ganlyniad mae dwy ysgol gynradd newydd wedi’u croesawu i'n plith a chapasiti yr ysgolion eraill wedi cynyddu hefyd.

Efallai eich bod yn ansicr ynglyn a dewis addysg cyfrwng Cymraeg? Cymerwch amser i ddarllen y dolenni am fanteision dwyieithrwydd, edrychwch ar wefannau’r ysgolion a chysylltwch gyda’r ysgolion er mwyn trefnu ymweliad a chael trafod eich dewis. Mae siarad gyda rhieni sydd â phlant mewn ysgol cyfrwng Cymraeg yn barod yn gallu bod o fantais hefyd. Gyda bron i 80% o blant sydd yn derbyn addysg cyfrwng Cymraeg yn Wrecsam yn dod o deuluoedd di-Gymraeg, mae’r ysgolion wedi hen arfer cefnogi’r plant a’u teuluoedd.

Why choose Welsh?

Pam dewis Cymraeg?

Pa bynnag iaith rydych chi'n ei siarad gartref, gall addysg cyfrwng Cymraeg roi cyfleoedd, profiadau a sgiliau ychwanegol i'ch plentyn. Mae dewis addysg cyfrwng Cymraeg yn rhoi’r cyfle i’ch plentyn ehangu ei sgiliau dwyieithog yn greadigol ac yn academaidd. Mae manteision ehangach i addysg ddwyieithog gan gynnwys effaith gadarnhaol ar alluoedd gwybyddol plentyn, ac mae’r buddion hyn yn para am oes.

Manteision bod yn ddwyieithog

• Mae meddu ar y gallu i siarad Cymraeg naill ai’n sgil hanfodol neu ddymunol ar gyfer nifer cynyddol o swyddi
• Gallu cymhwyso gwybodaeth mewn o leiaf dwy iaith
• Cynyddu'r gallu i ddysgu iaith arall
• Mae dysgu Cymraeg yn cynnig cyfleoedd i brofi dau ddiwylliant gan gynnwys llenyddiaeth, cerddoriaeth, cyfryngau digidol, a llu o bethau eraill
• Gall siarad Cymraeg helpu i feithrin dealltwriaeth lawnach o gymuned ehangach person a’i le ynddi
• Mae ymchwil yn dangos bod plant sy’n deall dwy iaith yn meddwl yn fwy hyblyg a chreadigol
• Gall helpu gyda phontio rhwng cenedlaethau os yw neiniau a theidiau neu aelodau o'r teulu yn fwy cyfforddus mewn un iaith.

I ddysgu mwy am y manteision hyn, gweler y fideos a'r erthygl isod:

Erthygl: Mae gan blant dwyieithog sgiliau meddwl fwy effeithiol yn ol ymchwil gan ddarlithwyr ym Mhrifysgol Bangor - Read now